الأحد، 21 أغسطس 2011

حفل توزيع جوائز أوسكار (إعلانات رمضان 2011)

(الحمد لله لم أتابع ولا مسلسل، ولكن الظاهر إني تابعت بدل المسلسلات الإعلانات كلها).

بعد بحث وتمحيص وتدقيق في أكثر من 25 إعلان تجاري إنتشر في كافة القنوات تم إختيار 10 إعلانات فقط للحصول على جوائز أوسكار (إعلانات رمضان 2011)، علماً بأن (الجوائز لا تعني بالضرورة إن الإعلان حلو... فيه جائزة أسؤا إعلان برضه).



ننتقل الآن لتوزيع الجوائز..

- جائزة الإعلان الأكثر تفاؤلاً تذهب بكل جدارة إلى : إعلان كوكاكولا (إفرد جناحك) وذلك بسبب الأغنية الرائعة لـ(كايروكي)، والتي قام الأطفال بإعادة غنائها مرة أخرى بنسخة أعتقد أنها أفضل حتّى من الأصلية، بالإضافة إلى فكرة الإعلان المبتكرة الباعثة على التفاؤل.







- جائزة الإعلان الأكثر تحرراً تذهب إلى : إعلان قطونيل.. الأول من نوعه والذي انتشر إنتشار النار في الهشيم... والذي يؤكد على أن الإصلاح يبدأ دائماً من الداخل.






- جائزة الإعلان الأكثر إبهاراً من نصيب : إعلان حملة إتصالات (عطشان يا صبايا)، مشاهد بصرية رائعة وزوايا تصوير مذهلة وأداء رائع من الممثلين في الأعلان.






-جائزة الإعلان الأكثر فقعاُ للمرارة تذهب بجدارة إلى : إعلانات (ترو شيبس) التي وصل بها الحد للألش في التلفزيون (الحق ما يزعلش حق).






- جائزة الإعلان الواقعي جداً تذهب بكل جدارة إلى : إعلان كيمو كونو (بودي اللي عايز يلعب ويننج)، إعلان ممتاز يعبّر عن واقع أغلبية المراهقين في هذا العمر، مع أداء ممتاز من (أوشا) و(اللي واقفين نكست) والعبقري (ناجي) الذي لم يتعرف على (بودي)..... "ملحوظة: الإعلان واقعي لحد ما بيشتري الكيمو كونو ... إزاي لقى جواه بلايستشن ثري ؟!"






- جائزة الإعلان اللي يستاهل الحرق تذهب إلى : إعلانات (لانشون دايم)، فكرة مبتذلة وأداء غبي، وموسيقى Alore on dance النسخة اللانشونية جعلت من الإعلان كتلة من الفشل.




- جائزة أفضل إعلان قصير جداً تذهب وبكل جدارة إلى : إعلان فودافون USB (شريف ؟ بيقولّك هنا إن السلعوة تحرك أذنيها قبل الهجوم على الفريسة ؟! إيه ؟! فريسة ؟!).

\


- جائزة الإعلان العادي اللي مالوش لازمة تذهب إلى : إعلان إتصالات (14 قرش ف البحر يعملوا كتير و14 قرش على الأرض)، إعلان ليس له فائدة وفكرته متوقعة منذ البداية.






(لم أجد الإعلان على اليوتيوب حتّى).

- جائزة الإعلان الأكثر لطفاً تذهب إلى : سلسلة إعلانات (فودافون شكراُ)، بأداء جميل وعفوي من معظم الممثلين، علماً بأن ظهور (نيللي) و(سمير غانم) لطّف من جو الإعلان أكثر.






-جائزة الإعلان الأكثر طرحاُ للتساؤلات تذهب إلى: إعلان (لابوتيه) مع هيدي كرم، الإعلان ده قديم ولا جديد ؟! ولو قديم مشفتهوش ليه قبل كده ؟! ولو جديد طب ليه تصويره كأنه في التسعينات ؟ وليه كاتب (تتجوزيني ؟!) بخط الإيد في ورقة 2متر ف 2 متر ؟!




والآن...


- جائزة أسؤا إعلان بميزانية ضخمة تذهب بكل جدارة إلى : سلسلة إعلانات (بيبسي ودنيا سمير غانم)، أداء متناقض وغير منطقي للشخصيات الثلاثة، فمثلاً طريقة الغناء في إعلان الكورة تجعلك تشعر بأنها (مغنية راب) وليست (لاعبة كرة قدم)، وشخصية (الخير).. ما علاقة أن (تكون دلوعة بابي) بأن تكون محبة للخير ؟! وهل من يحتاجون إلى هذا الخير سيفهمون (again walla one more time ?!)، أشك!، وشخصية المدّرسة، هل فيه مدرسات بالشكل ده ؟! ... حسناُ، قد يختلف الكثيرون معي ولكنه إعلان مخادع وغير حقيقي ومصطنع (من وجهة نظري).






وأخيراُ وليس آخراً...

جائزة أفضل إعلان تذهب إلى إعلانين حصلا على جوائز بالفعل ولكن هم الأفضل فعلاُ...


جائزة الإعلان الأفضل على الإطلاق (المركز الأول) من نصيب:  إتصالات (عطشان يا صبايا).

جائزة الإعلان الأفضل على الإطلاق (المركز الثاني) من نصيب:  كوكاكولا (إفرد جناحك).


شكراً لكل الإعلانات المحترمة التي فازت بجوائز محترمة وإخص على كل إعلان ضيعت وقتي في الفرجة عليه.
__
*تنويه: الجوائز هي من توزيعي الشخصي، لذلك قد تختلف معي فيها... عادي مفيش مشاكل قول رأيك.


هناك 10 تعليقات:

  1. nice one*

    sadik maghol

    ردحذف
  2. طبعا علشان انا صعيدي فلازم انحاز لعطشان يا صبايا

    ردحذف
  3. موافقه معاك فى كل النقط و خاصه اعجابى باعلان فودافون بتاع السلعوه فعلى الرغم من انه نزل فى نص رمضان لكنه مميز....اختلف معاك فى اعلان دنيا سمير غانم اللى اعجبت فيه بلذاذه دنيا و جمال صوتها و شوفته اعلان مميز....

    يا ريت تعمل اوسكار باقى الفئات غير الاعلانات

    ردحذف
  4. مش اختلاف كتير برضه :]

    ردحذف
  5. أزال المؤلف هذا التعليق.

    ردحذف
  6. متفقة معاك مية في المية.. او بمعني اصح 99% لأني شايفة ان اعلان افرد جناحك قبل عطشان يا صبايا.. بس الباقي تمام اوي.. ولكن اعتقد ان في ناس مش هيتفقوا معاك في الرأي على بتاع دنيا سمير غانم..

    ردحذف
  7. أزال المؤلف هذا التعليق.

    ردحذف
  8. بحييك بجد
    اسلوب و اختيارت رائعه
    كله دقيق و فى محله جدا
    انا اتفق معاك و بشده يا باشا

    لكن اوبجيكشن كبيييير على موضوع دنيا ده
    ليه ؟
    الاعلان من وجهة نظري كويس جدا , و معمول بشكل قوي جدا
    و كل حاجه فى محلها, و دنيا فعلا تقمصت التلت شخصيات .

    بالنسبه للرياضه : كأنسانه , فهي حيويه , نشيطه , مليانه طاقه , و بتحب تنجز ... و بالتالى مش هاتقف بقى تغني طرب اصيل , و اما غناها هايكون سريع و قوي , زي الراب فعلا . و اكيد حركاتها زي الغنى بالظبط .

    المدرسه : صدقني , فى مدرسين كده فعلا .

    الخير : الفكره من دلوعة بابي و الكلمتين الانجليزي .... انها يعني توضح انها غنيه قوي , و الاعلان رسالته انك مهما تكون غني و دلوع بابي وب تغير الدولاب .... فلازم تدي الفقرا . حاجه طبيعيه يعني .

    آسف ع الرغي القوي ده
    و اسمحلى اكون الفولور العشرين
    :)

    ردحذف
  9. د/دودي، سلمى، Teen :

    يظهر كده إن أنا الوحيد اللي كاره إعلان دنيا سمير غانم ! :)

    __
    teen (كمان مرة):
    منوّر واللـه.. وهديتك لإنك الفولور رقم 20 خُش على جوجل Images واعمل سيرش على "تورتة" وابقا اتمعّن فيها بعد الفطار :) :)

    ردحذف
  10. Lo0o0o0o0oLz .. :D :D

    M3onTish aylak 3'er Ya Fager !! :D

    ردحذف

إتكلّم!