الخميس، 1 مارس 2012

هنتكلم قبل ما نموت


هنتكلّم..
أصل الكلام وإن كان أحيانه ملوش طعم..
فهوّا ع الأقل.. 
مهوش سادة..
الكلام وإن مكنش موزون على لسان الناس.. 
المهم..
 يكون.. في قلوبهم..
عادة..

هنتكلم..
كتير.. ونقول..
كلام أغلبه فاضي..
وقليل منه.. هيكون معقول..
واللي يسكت فينا فجأة وِسط الكلام..
إعرف.. إنّه تاه..

هنتكلّم..
ونرسم أحلام مش هتتحقق..
ونشوف أفكارنا الفاضلة/اللي فاضلة
بتتفرّق..
وتتوزّع..
على ناس، كُل ما نبص لقدام..
كل واحد منهم.. يبُص وراه..


هنتكلم..
أصل ده اللي باقي لنا..
وهنرفع أيادينا بالهتاف..
لِناس..
مش بالضرورة، ف عز المرمطة..
تِتشاف..
.. إن كان جوة الحياة ما يُسمّى بالأمل..
فأحسن لِنا..
نِخلي جوّة أملنا.. ما يُسمّى بالحياة.

هناك تعليقان (2):

  1. جميييل قوووي يا عبدو :)

    هنتكلم

    بالعند فيهم

    ردحذف
  2. منوّر المدونة يا إبراهيم، فعلًا :)

    ردحذف

إتكلّم!