الأربعاء، 27 يوليو 2011

العباسية بعيون مستر "قِط"

أول مرة رآني فيها أخد الكمبيوتر بالحضن، عَرفت فوراً أنه قط "تكنولوجي"، لم تمر 48 ساعة وبدأ يلعب بالنوتة التي أكتب  فيها، ترجوته أن يهدأ فلم يفعل، مرت ساعات وبدأت في الكتابة على روقة فلوسكاب فأخذ يحاول أن يختطف القلم مني، فعرفت فوراً أنه قط "ليه ف الكتابة".


"ما تهدا بقه !"


كلما قلتها له يزداد شقاوة وكأنه يحب أن يغيظني وخلاص.


بعد أن أدركت أنه من المستحيل أن أكتب أي حاجة في مثل هذه الظروف قمت بفتح التلفاز، أمسكت الريموت فقفز على الريموت، أبعدته و(جبت) قناة "التحرير"، كانوا يتحدثون عن ما حصل في العبّاسية، المشهد العشوائي المتضارب والأصوات العالية هناك يبدو أنها جعلت أذنيه تتحركان في ضيق، سألته إن كان يريد أن أغيّر القناة ولّا إيه ؟!.
لم يرد، اكتفى بأن يهرش في رأسه قليلاً.


سألته بعد ذلك: "عاجبك اللي بيحصل ف العباسية ده ؟"، نظر لي نظرة (والمنظر ده يعجب حد يعني ؟!)، بدا وكأنه (زعلان)، نظرت له في شفقة وقلت "أكيد طبعا حاجة تزّعل لما تشوف ده بيحصل وإنتا مش قادر تعمل حاجة ؟ الأمور متلخبطة فعلاً"، ظل ينظر لي بنفس النظرة.


"إنتا أكيد زعلان من الناس اللي عمّالة تقول إن كل الناس اللي ف العباسية وغيره ثوّار.. مش كده ؟!"، وللمرة الأولى أخيراً يرد بـ"مياااو".


بالتأكيد كان يقصد بها "أيوة".


انتهى التقرير وجاءت الإعلانات، ظللنا صامتين نتابع التلفاز بهدوء حتى كـسرت الصمت قائلا: "طب تحب تعمل إيه علشان متفضلش زعلان ؟! ننزل التحرير ولّا كده احنا هنزيد الطين بلة ولا إيه ؟! أنا مش عارف"، حرّكت قلمي يميناً ويساراً في مشهد يُعرف في الأفلام بـ(التوتر)، انتفض القط فجأة وأخذ يطارد القلم وقد تبددت ملامح الحزن في عينيه، ابتسمت وسألته "كده إنتا مبسوط يعني ؟"، قال بنشاط:
" مياو مياو".

حينها أدركت بأن "مياو مياو" تعني (آه)، الله أعلم ماذا كان يقصد بـ"مياااو" الأولّانية، لنأمل أنه كان يقصد بها "مش عارف".

هناك 7 تعليقات:

  1. ههههه....مقالك اللطيف خفيف الشكل مهم المحتوى لفت انتباهى فعلا و عموما لما يفشل البشر فى معرفه الحق من الباطل و الصالح من الطالح بل حتى الشمال من اليمين فالحل النهائى هو القطط بلا شك

    ردحذف
  2. د/دودى:

    هوا مفيش حاجة إسمها "لايك" للتعليقات هنا ؟ :D

    ردحذف
  3. هههههه..ظريف اوي..اتمنى ان الناس كلها تبقى بذكاء القط اللطيف ده..هو اسمه ايه صحيح؟ :)

    ردحذف
  4. أميرة : شكراً :)

    غير معرف : مش هقدر أقول.. معلشي هوا مبيحبش الشهرة :D

    ردحذف
  5. انت بتعرف تصور حالة، معرفش اذا كان عندك نفس الموهبة في كتابة قصص طويلة او مقالات، انما انا حبيت طريقتك دي، ركز فيها وربنا يوفقك

    ردحذف
  6. Hossam Elamir :

    يارب ! (إبتسامة إلكترونية عريضة).

    ردحذف

إتكلّم!