الاثنين، 5 سبتمبر 2011

مصر لسه (متخرشمتش) "متخشرمتش سابقاً!"



الّلي ثَاروا..

والّلي بعد ما شافُوا اللي ثَاروا.. قامُوا غَاروا ..

والّلي شالوا الحِمل من غير ما يتكلموّا..

والّلي اتجمّعوا.. وعملوا فيها إنهم للشعب استشاروا..

واللي شافوا الحقيقية ولمّا اتكلِموا ..

اتبهّدِلوا ..

واتشردوا..

ثُم..

إستخَاروا..

ربُهم..

على إنهُم..

يكملّوا ولا ميكمّلوش..

وف النهاية... كمّلوا !

وطِلع أدائهم محترم.. ومش فاشوش..

ف اتندموّا..

أو متندّموش ..

ميهمنيش..

أحب أقول للي ف مصر بيعيش..

ثورة مصر لسّاها ما اتدمّرت ..

هيّا بس من قدام اتخربشت..

ومن الاكصدام (اتخرشمت)*..

باللي ماسكين البلد ..

أنا.. وإنتا.. والست الحاجّة.. والوالد.. والوَلد..

هنزُقّها ..

وهندعي ليها ..

إن الميكانيكي..

 يِلاقيها ..

-     -  أو حتّى نلقاه ! –

واللي كان بيزُق معانا.. وتــَاه ..

مفيش قُدامنا إلّا الدُعا بإنه يرجَع..

اللي راح دَه مِش هيرجع..

زقّة كمان ...... وصدقوني هنوّصل.

تمام يا جدعان ؟!

تمام..

هنبتدي شُغل بإذن الإله م اليوم ..

وموّصِيكمش .......

لمّا نوصل..

متنسوش تصحّوني م النوم..!



___

 *الخشرمة (أو الخرشمة) هي البهدلة أو التكسير، يُقال (العربية اتخشرمت، "أو اتخرشمت")، أي : "العربية باظت"
(تحديث: في البداية كان العنوان "مصر لسّه متخشرمتش" حيث أن الخشرمة هي الكلمة الأكثر انتشاراً على مسامعي ولكن بناءاً على طلب بعض الأصدقاء في المدونة وخارجها تم تغييرها حتّى يفهمنا المواطن البسيط، والله المُوفق).



ع.سالم
أغسطس 2011



هناك 10 تعليقات:

  1. a7eb 22olak enak zy mabtoktob makalt 7lw

    laken el kaseda el so8iara de

    agmal 7aga kr2taha leeek bgad

    sadek maghol

    ردحذف
  2. والله احنا مش هنعرف اتخرشمت ولا لأ إلا لما نروح عند الميكانيكي

    ردحذف
  3. يا ربي بجد حلوة اوي يا عبدالرحمن..
    والنهاية كالعادة جامدة اوي..
    بجد..انا باهنيك..

    ردحذف
  4. Hossam Elamir :
    أدينا هنعرف!
    بس على فكرة فيه ناس كتير بتقول "اتخشرمت"، رغم إنّي أعرف ييجي 7 أشخاص بيقولوا "اتخرشمت".. الكلمة معقدة وتدل على البهدلة، وده المهم :D

    ردحذف
  5. نو كومينت بجد
    زي ما اتّقالك قبل كده
    زي ما مقالاتك جميله
    شعرك كمان اجمل
    و الاهم ان فيه رساله حلوه قويييييي
    بجد برافو عليك يا ع باشا

    و على فكره اعتقد اني سمعتها ( اتشخرمت ) مش ( اتخشرمت ) ..... لكن على اي حال , شكله مصطلح جديد من اللى بيطلعو

    و احب مره تانيه احيييييييك
    :)

    ردحذف
  6. Teen :
    شكراً على التعليق، وبُص تاني كده على التغيير اللي حصل :D

    ردحذف
  7. بحب الخواطر بالاسلوب ده جدااااااااا
    حلوة اوى .. عجبانى اوى
    ميرسى ع.سالم

    ردحذف
  8. فعلا كلام رائع الله ينور عليك

    ردحذف

إتكلّم!